[东方日报]欧冠：禾堡跌Watt讓唔起里爾[12-08]

august

今晚歐聯G組另一場關鍵戰，禾夫斯堡主場火併里爾。禾堡為晉級今仗非勝不可，可惜「新帥效應」已過兼狀態跌Watt，相反里爾近況回升之餘，今屆歐聯僅曾1敗，唔輸即出線下必定打穩陣波，有得受讓咁筍，讓球客勝咪錯過。

禾夫斯堡態沉壓力大
禾夫斯堡早前怒炒荷蘭名宿雲邦美，改由高菲特接手，一度喺各項賽事連贏3場，但嚟到近4仗又變番1和3負，已經打回原形。其中上輪歐聯淨吞西維爾兩蛋，令禾堡跌落小組榜尾，依家落後次席薩爾斯堡2分，若想殺上前2嘅出線席位，今仗許勝不許和，但以佢哋咁低迷嘅狀態，加上壓力巨大，唔係話想贏就贏到。

另一邊廂，里爾依家位居G組榜首，由於落後1分嘅薩爾斯堡及落後2分嘅西維爾，喺今輪要正面交鋒，至少會有一隊失分，因此里爾今仗只要唔輸有分落袋，就可以鎖定前2名嘅出線資格。雖然里爾戰績唔及上季，但各項賽事近7仗取得4勝3和，表現回穩，前鋒約拿芬大衞更頻有士哥。單計今屆歐聯，呢支上季法甲盟主5戰取得2勝2和僅1敗，今仗和波就搞掂，壓力比禾堡細得多，絕對有力全身而退，讓球客勝捧得過。