[东方报]英超：搶分上岸戰意十足 列斯聯半W追打般尼[05-01]

十七号

英超獨腳戲上演護級大戰，季尾上晒力嘅列斯聯，主場對住已篤定降班嘅般尼，肯定大打落水狗。列斯聯依家距離降班區6分，形勢唔差，但要盡早搶夠分上岸，主場不勝無歸，佢哋近期進攻夠搶韁，有望盡早搞掂士無鬥志嘅般尼，半場主勝抵玩。（Now 621周六凌晨3時直播）

護級球隊喺季尾一向特別醒神，列斯聯亦唔例外，近5場聯賽未輸過，搶到9分令護級形勢大好，而且早段搶攻踢法效果唔錯，贏曼聯同狼隊兩仗，都係上半場已經領先2球，最近5仗有3次半場領先。列斯聯想盡快確定護級，呢3分相信係最易擸到，今場肯定會火力全開。

奧卡科頻頻有波入
列斯聯依家陣容完整，除咗伊利亞古爾夫收咧外，其餘主力悉數候命。雖然首席射手卡維特利雲近期表現跌Watt，不過瑞士前鋒諾亞奧卡科就成功頂上，佢自2月份開始已經入咗5球，確保列斯聯有足夠火力。

般尼上場輸畀曼城後，宣告護級失敗，陪狼隊一齊降落英冠，今場戰意成疑。事實上，般尼喺季中開始已經打定輸數，近8場聯賽2和6負，當中有5場係喺上半場已經落後。般尼依家冇嘢好爭，有傷嘅杜安薛比、查頓安東尼同米積伯利等上陣成疑，今場作客列斯聯預計都係任宰割。