[东方报]歐協：水晶宮夠料創歷史[05-27]

十七号

英超壟斷歐戰錦標第2關
英超囊括歐洲3大盃過3關，嚟到第2關！今晚喺德國中立場上演歐協聯決賽，由英超球隊水晶宮硬撼西甲分子華歷簡奴。水晶宮唔單止實力比華歷簡奴勝一籌，而且上下一心，希望用獎盃送別即將離隊嘅主帥格拉斯拿，主勝有計。（Now 638周四凌晨3時直播）

今屆有3支英超球隊殺入歐洲3大盃決賽，上周中阿士東維拉率先喺歐霸盃大勝弗賴堡封王，先過頭關，今晚輪到水晶宮闖次關。呢支倫敦球隊今屆歐協聯表現出色，於總入球數（25球）、重奪球權（557次）等數據均領導群雄，連附加賽在內，水晶宮今屆14場獲8勝3和3負，單計近4仗更取得3勝1負，前鋒伊斯美拿沙亞更以9球位居射手榜「1哥」，其中近5仗場場有入波，腳風順到冇朋友。

盼用獎盃送別主帥
水晶宮喺主帥格拉斯拿帶領下，實現多項「零的突破」，包括勇奪上屆英足盃和季前社區盾，以及首度出征歐戰即殺入歐協聯決賽，可謂成就非凡，話佢係水晶宮史上最成功領隊亦不為過，而佢喺2022年亦帶領德甲球隊法蘭克福捧走歐霸盃，應付呢類歐戰決賽有一定經驗。由於格拉斯拿已宣布今季季尾約滿就離隊，即係今仗係佢告別戰，相信眾會更加拚搏，用獎盃令呢位功勳教頭喺水晶宮畫上完美句號。

華歷簡奴晉級過程未受考驗
另邊廂，華歷簡奴當然亦非善類，今屆12仗獲8勝1和3負，共入22球，火力僅次於水晶宮。但若單計淘汰賽，華歷簡奴所遇嘅對手，只係薩姆松、AEK雅典及斯特拉斯堡等二線球隊，難度較水晶宮（先後淘汰AEL拉亞拿卡、費倫天拿、薩克達）為低，對華歷簡奴而言，今仗先係真正考驗，相信水晶宮可恃質喺法定時間贏波捧盃。