[东方报]國友賽：唔會去盡 波斯尼亞老將孭飛以和為貴[05-29]

十七号

世盃決賽周迫在眉睫，列強熱身賽陸續開動。波斯尼亞出發去美國備戰世盃前，今晚喺主場約戰北馬其頓「拍跳」。波斯尼亞今屆點兵重用舊將，合作性高，今場志在磨練狀態，相信會避重就輕，對住實力接近嘅北馬其頓，一定唔會去盡，好大機會以「和」為貴。（周六凌晨2時30分開賽）

今屆第2次出戰世盃決賽周嘅波斯尼亞，點兵都係熟口熟面，40歲嘅射手迪斯高仍然係台柱，佢同後衞哥拉辛拿斯都有份踢2014年世盃，亦反映球隊出現青黃不接問題。

迪斯高傷愈狀態成疑
除咗最近入籍即獲徵召嘅進攻中場馬希米，隊中大部分球員都合作過一段時間，領隊巴巴斯都領軍超過3年，踢法已經成形，唔需要再試陣。

波斯尼亞着重整體戰，踢法偏向穩陣波，迪斯高季尾膊頭受傷抖咗成個月，復出之後都未踢過正選；效力慕遜加柏嘅前鋒達巴高域亦係帶傷入選，今場多數唔會上陣，削弱爭勝能力。波斯尼亞穩打穩紮，喺世盃附加賽2場分別同威爾斯、意大利打和，靠互射12碼出線，最近3場賽事全開和局，防線頂得兩嘴。

另邊廂，北馬其頓雖然入唔到今屆世盃，但佢哋只係喺附加賽出局，整體實力同波斯尼亞相差唔遠，兩隊過去3次交鋒，有2次打成平手。北馬其頓踢法同樣係守優於攻，佢哋近6場賽事有4次打和，當中3場同對手悶和0比0，強如比利時都畀佢哋守和，今場不妨直取和局。