[东方报]國友賽：搵阿爾及利亞試刀荷蘭守強攻弱半和[06-03]

十七号

世盃「無冕之王」荷蘭，決賽周前首場熱身賽，喺鹿特丹迎戰非洲球隊阿爾及利亞。兩隊都係決賽周隊伍，實力唔會相差太遠，荷蘭雖然牌面更強，但係進攻上有唔少隱憂，今場亦會試陣為先，未必會全力出擊，好大機會變拉鋸戰，博半場和。（Now 618周四凌晨2時45分直播）

前線孭飛人物冇個掂
荷蘭大軍集結後，一直留喺本土集訓，踢埋今場熱身賽之後，就會飛去美國最後備戰，有舉行誓師大會意味，預計領隊朗奴高文用今仗作為藍本，備戰世盃分組賽對同樣來自非洲嘅突尼西亞。荷蘭防線有華基爾雲迪積克領軍，防守有保證，不過進攻就欠缺孭飛人物，老將迪比、韋格賀斯仍然入選，加普、雷恩達斯狀態一般，進攻中場沙維西蒙斯重傷落選，創造力成疑。

阿爾及利亞踢法硬淨，佢哋用今仗嚟備戰分組賽對奧地利，相信會認真作戰。阿爾及利亞防守力強，佢哋近4場比賽有3場保持不失球，上仗曾0比0守和烏拉圭，對上4仗3次開出半場和，半場和要跟進。