[东方报]英超：車路士留力爭足總盃 列斯聯半和頂得住[05-11]

august

周四凌晨另一場英超對決，列斯聯主場挑戰車路士。為留力英格蘭足總盃決賽，「車仔」今場難以全力出戰，況且呢支倫敦球隊近期表現慢熱，面對仍要為護級努力嘅列斯聯，想喺半場前打破僵局有一定難度，一於吼實半場和。

車路士近期聯賽作客頻頻失分，包括早前以0比1不敵護級分子愛華頓，進攻表現不濟係一大主因，其中夏維斯同基斯甸普列錫等前場主力，入球效率都只係一般，而且「車仔」近期入局較慢，計埋上場被狼隊逼和，近4仗半場都同對手互交白卷。

由於即將喺英足盃決賽硬撼利物浦，「車仔」喺聯賽無緣爭冠嘅情況下，為免錯過今季最後嘅捧盃良機，預計今場聯賽會喺陣容上作出調整，或會收起部分主力，以留力對戰「紅軍」。

近3對賽半場未分高下
降班危機尚未解除嘅列斯聯，自從新帥馬殊上任後，球隊表現已見改善，但今場有史超活達拉斯和艾寧等主力缺陣，面對強敵來襲，相信列斯聯都唔敢冒進，開局寧願以穩固防守，保住不失為首任。回顧往績，兩軍近3次交手半場都打和，今場半場和值得再追。