[东方报]意盃：黃金攤路！祖記國米追半和[05-11]

august

今晚意大利盃決賽，祖雲達斯於中立場奧林匹高球場火併國際米蘭。祖雲達斯係上屆冠軍，國米則勝在防守穩健，雙方勢均力敵，而且近年意盃決賽有個黃金數據，全部半場不分勝負，今場半和值得再追。

藍黑兵團防守硬淨
祖雲達斯係意盃決賽常客，佢哋近7屆6次殺入決賽，當中5次捧走冠軍，經驗老到。今季「老婦人」喺C朗離隊後，意甲暫時只排第4，爭標無望，而且今屆歐聯又於16強出局，意盃成為佢哋唯一奪標希望，今場當然會加倍小心。祖雲達斯上場聯賽領先一球下被熱拿亞反勝2比1，不過該仗佢哋只係半力出擊，明顯為今仗留力。

國際米蘭上周聯賽遭遇啱啱同祖雲達斯相反，佢哋先落後兩球，跟住連入4粒反勝安玻里4比2，現時分別喺意甲及意盃「叫雙飛」。事實上「藍黑兵團」係今季意甲失波最少球隊之一，36場聯賽只失31球，今場誓築起銅牆鐵壁頑抗對手。翻查紀錄，原來近年躋身意盃決賽嘅球隊都踢得特別謹慎，近4屆全部開半場和，值得留意嘅係，當中3屆祖雲達斯都係決賽分子，呢個黃金數據參考性極高，今場半場和抵玩。