[东方报]英超：李斯特城歎私房菜有口福[08-07]

august

今晚英超早場之一，李斯特城主場迎戰賓福特。雙方今季同樣面對主力離隊，相比下「狐狸」李斯特城整體實力仍然較佳，加上近4次同賓福特交鋒，李斯特城全勝，擺明格食格，一於再追主勝。

李斯特城今夏仍然未簽入重要新兵，鋒線上繼續靠占美華迪及伊恩拿祖爭取入球，中場由占士麥迪臣指揮大局，以原有班底出擊，勝在夠默契。唯一令人意外，係協助球隊捧英超及英足盃冠軍嘅門將兼隊長卡斯柏舒米高離隊，轉投法甲球會尼斯，防線冇咗呢位大哥指揮，的確令人有啲擔憂。好彩蘇恩古及莊尼伊雲斯等守將身經百戰，相信可以將卡斯柏舒米高離隊嘅負面影響減到最低。

賓福特防守欠佳易失波
上季升班後有驚喜演出嘅賓福特，未能留住基斯甸艾歷臣，呢位丹麥中場轉投曼聯後，球隊進攻組織力勢必受削，鋒線上惟有靠艾雲東尼單打獨鬥，效果肯定事倍功半。加上佢哋防守向來不穩，上季38場聯賽失咗56球，仲多過降班嘅般尼，恐怕難以抵擋李斯特城來犯，一於撐「狐狸」打響新季頭炮。