[东方报]欧冠：歐聯16強大展鴻圖[02-13]

十七号

等咗兩個月，歐聯喺新正頭返嚟啦！今晚先有兩場16強，分別係哥本哈根主場對曼城，同埋重頭戲皇家馬德里作客RB萊比錫。其中「哥曼戰」有兩大挪威射手鬥射術，而「萊皇戰」雙方都係以攻代守，預計今晚肯定係「入球盛宴」，撐佢哋齊齊「大」展鴻圖啱數。

萊比錫皇馬鬥攻格
今晚歐聯16強首回合重頭戲，有「德西對決」RB萊比錫主場火併皇家馬德里。萊比錫近期猶如不設防，「銀河艦隊」雖有祖迪比寧咸因傷倦勤，幸好巴西孖寶雲尼斯奧斯祖利亞同洛迪高高斯搵番射門鞋，鬥攻格局實多波入，2.5球大盤咪錯過。（Now 644周三凌晨4時直播）

萊比錫歇冬後狀態轉沉後防穿晒窿，近5場只得1勝1和3負共失11粒，猶幸前線保持火力，呢5場共入8球，奧賓達雖然上仗對奧格斯堡射失12碼，但仍然連續4場有士哥，拍檔施斯高近3仗亦有波入，因此呢支德甲球隊今屆6場歐聯全開3球或以上，今仗勢必以攻代守。

「艦隊」鬧中堅荒易失波
貴為14屆歐聯霸主，皇馬今屆6場歐聯贏晒，日前西甲榜首大戰又擊敗基羅納，甩開對手5分，順到冇朋友。雖然進攻核心祖迪比寧咸扭傷足踝肯定缺陣，近況唔錯嘅巴謙戴亞斯可代替其位置，巴西孖寶雲尼斯奧斯祖利亞同洛迪高高斯亦回勇，後者上仗對基羅納亦打破入球荒，攻力有保證。不過，「銀河艦隊」近期鬧中堅荒，魯迪格、阿拉巴、艾達米列達奧均受傷，焗拉中場曹亞文尼同右閘丹尼爾卡華積串演中堅，防線不穩，佢哋近9仗亦有7次開3球或以上，隨時合演入球騷，大盤有計。