[东方报]美洲盃：球王力爭衞冕 阿根廷半W手到拿來[06-20]

十七号

今屆美洲國家盃喺周五早上揭開戰幔，有衞冕嘅阿根廷打頭陣，喺A組首輪迎戰加拿大。阿根廷有球王美斯助陣，實力遠勝加拿大，而且擅於先發制人，預計初段會立即搶攻，半場主勝有計。（HOY TV 76台周五早上8時直播）

阿根廷接連勇奪上屆美洲盃及世盃，信心爆晒棚，各項賽事近14場獲13勝僅1敗，雖然要倚重美斯、迪馬利亞等老將，但佢哋仍然老而彌堅，再配合祖利安艾華利斯、阿歷斯麥亞里士打、安素費南迪斯、阿歷真度加拿祖等英超兵，做到攻守平衡，而美斯仲未話一定會參加下屆世盃，今屆美洲盃隨時係佢同老友迪馬利亞嘅國際賽「最後探戈」，必定搏盡。

另邊廂，加拿大在3月突然換帥，由曾執教RB萊比錫、列斯聯嘅教頭馬殊上任，頭兩場領軍只得1和1負之餘，全部食白果，未見新帥效應。事實上「楓葉國」今次出征的名單中，名氣最大只有拜仁後衞艾方素戴維斯及里爾前鋒約拿芬大衞，陣中其他球員質素平庸，難對阿根廷構成威脅。

加拿大未見「新帥效應」
何況阿根廷非常重視美洲盃，「潘帕斯雄鷹」近8場美洲盃，法定時間全部都喺上半場取得領先優勢，非常搶韁，面對實力一般嘅加拿大，有望早早領先，半場主勝值得捧場。