英超：阿仙奴反撲明恰白禮頓

數字上仍係英超前4爭逐失分最少嘅阿仙奴，周六主場迎戰白禮頓不容有失。「兵工廠」上仗意外吞水晶宮3蛋，今仗返主場肯定會奮力反撲，佢哋喺酋長球場向來「欺善怕惡」，面對實力較弱球隊絕少甩拖，白禮頓到訪肯定凶多吉少，主勝定過抬油。

阿仙奴上場作客以0比3不敵水晶宮，並因得失球差唔及多踢1場嘅熱刺，跌落第5位，對於爭入前4參加下屆歐聯造成打擊，餘下聯賽每仗都會當成決賽咁踢。事實上「兵工廠」季尾狀態唔錯，就算上仗輸波，近8場聯賽都有6勝，而且今季主場表現「正氣」，除輸畀曼城、利物浦、車路士3強之外，其餘12場聯賽主場對住較弱球隊，獲10勝2和佳績，白禮頓實力一般，難喺酋長球場作惡。

白禮頓季初成績理想，中游位置已經非常穩陣，既不愁降班亦難搶歐戰席位，所以球隊近期戰意明顯不足，近7場聯賽僅得1和6負，對上6場更有5仗交白卷，首席射手馬奧比已接近2個月冇入波，白禮頓態沉兼士無鬥志，難阻阿仙奴全取3分。