達Sir神調動 阿仙奴撳掣反勝列斯聯

尋晚英超頭場，阿仙奴憑卡拉費奧利同後備入替嘅般奴古馬雷斯建奇功，喺主場以2比1反勝列斯聯，啱啱同「兵工廠」續約嘅主帥阿迪達神調動奏效。

之前於國際賽負傷而回嘅阿仙奴球員如安斯干沙、夏維斯等，今仗意外地正選披甲，但除咗夏維斯兩次威脅唔大嘅頭槌攻門外，面對列斯聯密集防守，上半場都老鼠拉龜冇碇埋手。反而列斯聯攻勢更入肉，先有諾亞奧卡科遠射省到人僅僅斜出，完半場前加比爾古蒙臣窄位抽射，被阿仙奴門將大衞拉耶封出，半場互交白卷。

卡拉費奧利又有士哥
易邊後阿仙奴未有起色，令列斯聯更大膽壓上，中場田中碧放冷箭被救出，但過到初一過唔到十五，56分鐘加比爾古蒙臣左路橫傳，門前多人漏晒，畀遠柱嘅後衞占士祖斯甸執到雞，打破僵局。好彩阿仙奴7分鐘後立即扳平，馬度基左路傳中，賓韋特頭槌二傳，卡拉費奧利入楔撞入，繼上周中歐國聯為意大利建功後，呢位左閘連續2仗有士哥。主帥阿迪達之後再換入約基利斯同般奴古馬雷斯等，立即收效，70分鐘般奴古馬雷斯遠射破網，協助「兵工廠」反勝2比1。