[东方报]歐冠：迪比利領軍火力有保證 PSG英超剋星唔赦曼城

歐聯焦點大戰，曼城主場惡鬥巴黎聖日耳門（PSG），「藍月亮」曼城今季各項賽事8戰全勝，但當中對手偏弱，上場英超能夠擊敗利物浦，好大程度上由於對方殘陣兼踢少一人，不宜作準。至於連奪兩屆歐聯冠軍嘅PSG堪稱「英超剋星」，由奧士文尼迪比利帶領嘅鋒線攻力有保證，加上近9次歐聯對英超球隊，法定時間取得7勝2和，今場有得受讓，一於捧讓球客勝（+1）。（Now 638周四凌晨3時直播）

曼城由馬利斯卡接手執教後，看似延續「哥帥時代」強勢，獲得8戰8勝，但只要留意賽程，就會發現呢份佳績其實有「水分」，對手包含5支弱隊般尼茅夫、水晶宮、高雲地利、諾域治、新特蘭，以及憑爭議性入波險勝頹勢嘅曼聯1比0，上輪歐聯要踢到補時入波，先贏到波圖2比0，亦欠缺說服力。

藍月未完全撻着讓唔起
雖然話曼城上場英超大炒利物浦3蛋，但主因係「紅軍」有3位中前場主力阿歷山大伊沙克、加普、蘇保斯拉爾因傷缺陣，而且要等到賴恩格雲貝治領紅牌被逐之後，「藍月亮」先至入到波，鋒線未完全撻着，切勿高估「藍月亮」攻力。

另邊廂，巴黎聖日耳門可以連續兩屆歐聯捧盃，證明教練安歷基已建立一套行之有效嘅「勝利方程式」，並且對付英超球隊特別有心得，包括上屆16強及8強分別「雙殺」車路士、利物浦，決賽憑互射12碼贏阿仙奴。同埋PSG曾於2025年1月歐聯4比2擊敗曼城，輝煌往績支持下，球員信心有優勢。最重要係PSG已擺脫季初弱勢，近4仗全勝，近7場當中，有5場攻入2球或以上，鋒線火力有保證，加上近9次歐聯對英超球隊，法定時間取得7勝2和，今仗有望全身而退。