[东方报]歐國聯：高普沙維名帥鬥法德國 未執掂希臘見真章直取半W

歐國聯A2組另1場，希臘主場迎戰塞爾維亞，第2位希臘只要贏波就好大機會出線，戰意一定高昂，反觀包尾嘅塞爾維亞5戰全敗，其中近4場有3次上半場落後，毫無鬥心，希臘勢必先下手為強，以免夜長夢多，不妨直取半場主勝。(周二凌晨3時45分開賽)

塞爾維亞無心戀戰
希臘上場作客以0比7大敗於荷蘭腳下，被德國追至同分，但希臘對賽成績佔優，加上德國要鬥榜首荷蘭，隨時失分，所以希臘今場只要全取3分，就好大機會出線明年3月舉行嘅8強淘汰賽。事實上，希臘上仗慘吞7蛋，似乎有所留力，包括正選陣容收起今季表現大勇嘅科木前鋒杜域卡斯，皆因與其浪費力量同勁旅荷蘭硬拼，不如養精蓄銳全力爭取擊敗最弱嘅塞爾維亞，出線機會更大，相信希臘今仗「打真軍」，足以迅速攻破塞爾維亞大門。

至於塞爾維亞上仗主場1比3不敵德國，開賽14分鐘已經落後2球，球員根本無心戀戰，最離譜係2位後備上陣球員雲查達高積域、安迪查施夫高域大踢茅波，同樣領紅牌被逐，令人懷疑佢哋想「申請」提早離隊。塞爾維亞軍心散漫，好可能又迅速崩潰，上半場落後，由頭輸到尾。