[东方报]西甲：夜演國家打吡 巴塞艦隊半大鬥攻

今晚西甲爆發國家打吡，「1哥」巴塞隆拿主場火併死敵皇家馬德里。巴塞啱啱喺歐聯被打破今季不敗身，梗係想贏波反彈，不過「銀河艦隊」連場報捷，信心爆晒棚，為追趕巴塞一定搶攻，加上雙方每逢碰頭例入局快，隨時一開波即駁火，捧1.5球半場大更划算。（Now 632周一凌晨4時直播）

巴塞今季開咧順風順水，各項賽事頭11場全部贏晒，包括聯賽9連勝兼狂轟39球，拉芬夏比洛尼與拉明耶馬已佔咗20粒，火力冠絕群雄，依家高踞榜首。點知日前歐聯作客巴黎聖日耳門，力戰之下輸2比4，全勝同不敗身齊斷纜，仲傷埋中場丹尼爾奧莫，賠了夫人又折兵，萬一今仗對皇馬稍有差池，積分上此消彼長，所以不容有失。巴塞一向搶韁，近7仗聯賽半場全開2球或以上，其中6次半場領先，今仗必定先下手為強。

耶馬麥巴比腳風順
皇馬今夏有摩連奴回巢執教，雖然近期是非多多，例如雲尼斯奧斯祖利亞於西甲被罰停賽4場，依家仲有3場波監要坐，今仗肯定冇佢份。但有危亦有機，反而畀到「寸王」打造屬於自己心水球隊嘅機會，包括畀恩迪奧文迪代替雲尼斯奧斯、將費達歷高華維迪與艾達古拿固定喺右閘及組織型防中等，相當成功，射手基利安麥巴比亦腳風奇順，難怪近4仗贏晒狂入13粒。現時「銀河艦隊」落後巴塞6分，聯賽流流長唔係冇得追，今仗實搏甩髀。何況雙方近4次碰頭，半場全開2球或以上，預計初段即埋牙，博半場大早啲收錢。