[东方报]英超：落難豪門先求穩守 車仔曼聯細紀鬥

英超落難豪門「細」紀對決！車路士同曼聯近期齊陷信心危機，上輪聯賽分別喺主場慘敗，哀兵上陣要先求「止血」。車路士近期銳意加強防守，曼聯作客亦會大踢穩守突擊，「驚輸」心態下難以開懷進攻，今場開2.5球入球細機會高。(Now 621及611周六晚8時30分直播)

車路士季初踢法有前冇後，不過好睇唔好食，近期沙比阿朗素刻意平衡番攻守比重，之前2比0贏愛華頓力保不失，上場聯賽對熱刺亦大部分時間膠着，只因尾段1個烏龍波同紅牌而落敗，周中英聯盃作客利物浦亦踢成1比1，明顯唔再「擺大個頭」。特別係射手祖奧柏度養傷，更令車仔缺乏強攻本錢。

曼城夫添速破白禮頓
曼聯情況更加惡劣，最近8場賽事未逢1勝，消息指卡域克暫時保住帥位，但今場再有閃失就九成九冇得留低，作客史丹福橋球場肯定踢得穩陣，至少唔好再輸波。兩大豪門都有唔輸得嘅壓力，踢得保守係人之常情。睇番兩隊近7次聯賽交手，有6次總入球開2球或以下，今場再追入球細。

另一場前列大戰，由曼城迎戰白禮頓，兩隊唔夠72小時前喺英聯盃交鋒，白禮頓兩度領先下被曼城追和，最終半力出擊嘅曼城射贏12碼晉級。曼城今場有艾寧夏蘭特、伊利文尼戴耶等主力回歸，火力更強；相反白禮頓有走下坡之勢，近3仗2和1負。曼城近6次聯賽對白禮頓，全部半場領先，半場主勝安心捧場。（Now 621周六晚11時直播）