[东方报]英超：希雲頂硬上防線好牙煙 曼聯讓唔起維拉

英超焦點大戰，曼聯主場惡鬥阿士東維拉，「紅魔鬼」上周中歐聯反勝羅馬，總算結束各項賽事連續9場不勝頹勢，但其實該仗能夠贏波，好大程度上因為對手連番犯錯，不宜高估。雖然維拉喺歐聯輸波，但近5場聯賽取得3勝2和，包括擊敗曼城，今場有得受讓平半，下盤值博。（Now 621、622及611周一凌晨零時30分直播）

曼聯上場歐聯贏得驚險，上半場落後兩球，防線仍然不穩，換邊後能夠反敗為勝，要多謝羅馬「送禮」，呢支意甲球隊先喺禁區內犯規，令「紅魔鬼」獲得12碼，跟住中堅李安納度巴拿迪解圍踢「空氣」，被馬菲奧斯根夏射入，曼聯反勝1球亦係巴拿迪犯錯所致，甚至可以話「紅魔鬼」贏在夠運，今場英超能否延續運氣，實屬疑問。

積遜文森比腳風順
此外，「紅魔鬼」中場卡路士巴利巴上場歐聯傷出，預料要抖數星期，加上中堅利辛度馬天尼斯停賽，意味焗用20歲小將艾登希雲擔任正選，令原本脆弱防線雪上加霜。以曼聯近7場聯賽4和3負慘淡成績，實在冇本錢讓波。

另邊廂，阿士東維拉上場歐聯作客以0比3不敵西甲一哥巴塞隆拿，皆因對手實力太強，輸波情有可原。幸好維拉踢英超水準可靠，而且愈戰愈勇，代表作一定係贏曼城2比1，令對方聯賽開季7連勝走勢斷纜。前鋒尼高拉斯積遜腳風極順，近兩場英超射入3球，加上新星文森比近5次英超披甲入2球及3次助攻，足以撕破「紅魔鬼」防線，有力坐和望贏。