[东方报]英聯盃：累鬥累！愛華頓細盤啱素

英聯盃16強壓軸之戰，愛華頓主場對紐卡素，兩隊近況都欠佳，愛華頓2連敗兼捧蛋，攻力甚為疲弱，「喜鵲」紐卡素成績亦唔好得去邊，近5場輸3場，名副其實係「海軍鬥水兵」水鬥水，預料戰局會陷入膠着。睇番愛華頓近6場有5次總入球開2球或以下，寧願博2.5球嘅入球細。（無綫myTV SUPER周五凌晨3時45分直播）

愛華頓主帥莫斯耶戰術部署一向擅守不擅攻，會方今夏將進攻核心伊利文尼戴耶賣走，令球隊現時只有泰亞路巴利一位正宗前鋒，但佢把握力甚差，今季8場英超已錯失12次絕佳入波機會。不過，「拖肥糖」防線尚算穩陣，近2場分別對勁旅車路士、阿仙奴，同樣以0比2落敗，近3次主場出擊有2次贏1比0，今仗就算贏波，都係小勝居多。

紐卡素近排踢得保守
紐卡素開季曾有不俗演出，但近5場只有2勝3負無以為繼，最離譜係英超作客以1比4大敗於新升班球隊高雲地利腳下。領隊查斯利吸取教訓後，近2場採取比較保守踢法，分別0比1不敵阿士東維拉及小勝水晶宮2比0，總算及時止血，相信會延續呢套穩健戰術。由於英聯盃16強一戰定生死，估計兩隊都唔會冒進，隨時1球決勝負。