曼城降班夏蘭特可離隊？合約有啟示

曼城因為財務違規，面臨被大幅扣分降班，隊內球星前途備受關注，尤其係神鋒艾寧夏蘭特會否走人。根據西班牙傳媒爆料，呢位挪威國腳合約並冇「降班離隊條款」，意味一旦「藍月亮」降班，佢只能留隊踢英冠。

有唔少英超球員合約包含「降班特殊條款」，例如球隊降班，就有權離隊，或者需要減薪。可能曼城實力太強，艾寧夏蘭特冇諗過降班問題，並冇加入呢項條款，如果「藍月亮」降落英冠，佢嘅合約都唔會改變，呢位射手仲有8年合約在身。

事實上，以往都有球星陪球隊降班踢低組別聯賽，最具代表性係祖雲達斯因為假波案，被罰2006/07年球季降落意乙，鋼門保方、射手迪比亞路、查斯古特、中場尼維特等多位球星都願意同球隊共患難踢意乙，僅1季就重返意甲。