曼聯斟15歲挪威神童　潛力更勝夏蘭特？

曼聯16歲天才新星JJ加比爾鬧離隊，會方做定兩手準備，積極搜羅小將，補充未來人才庫，英國傳媒指紅魔鬼睇中效力挪超球隊華拉倫加嘅翼鋒加比爾拉積高域，準備等佢明年2月年滿16歲，將呢位「神童」收歸旗下。

加比爾拉積高域屬於左腳球員，喜歡右路突破，扣入中路用左腳射門，被指踢法似荷蘭名將洛賓。呢位超級天才以15歲零20日成為挪超史上最年輕上陣球員，再以15歲零166日成為挪超史上第2年輕入波球員，僅比紀錄保持者馬田奧迪加特「年長」15日，足以證明加比爾拉積高域潛質極優厚，將來有能力同馬田奧迪加特一樣登陸英超，甚至潛力更勝前輩艾寧夏蘭特。

加比爾拉積高域今季聯賽上陣14次入2球及1次助攻，曼聯迅速出手，希望收購呢位超新星。根據規例，加比爾拉積高域必須年滿16歲先至可以出國搵食，紅魔鬼現時最多只能「預訂」，挪威傳媒指加比爾拉積高域身價達1,600萬鎊(約1.66億港元)，有望成為挪超球隊史上最高價出售球員。