神童「戴帽」創紀錄　意甲兵團挽回面子

周五(16日)凌晨歐霸盃，AC米蘭作客4比0大炒薩爾斯堡，年僅19歲嘅艾法祖施斯個人大演帽子戲法，成為史上最年輕歐洲「戴帽」嘅意大利球員。

AC米蘭喺歐霸盃首戰輸波，今場不容再失，估唔到變成艾法祖施斯個人表演，佢喺49分鐘內連入3球，干卡路拉莫斯72分鐘錦上添花，幫「紅黑兵團」取得大勝。

艾法祖施斯今場只係踢60分鐘，4次射門全部命中入咗3球，以19歲零358日之齡，成為意大利史上最年輕歐戰入3球球員，亦係自2002年恩沙基後，AC米蘭首個歐戰「戴帽」球員。

除AC米蘭贏波外，祖雲達斯作客亦2比1反勝切爾達，加上阿特蘭大喺歐協聯3比1贏帕福斯，意甲3隊今輪歐霸、歐協聯贏晒，洗脫歐聯4支代表今輪全部輸波霉氣，挽回些少面子。