土耳其怒炒蒙迪拿　阿達杜倫有望接手

土耳其今屆歐國聯4戰4敗，該國足總忍無可忍，現時正式宣布解僱領隊蒙迪拿，盛傳39歲名宿阿達杜倫有機會接任成為新帥。

蒙迪拿曾執教費倫天拿、AC米蘭、西維爾等球隊，其後去土超搵食，2023年9月成為土耳其國家隊主帥，率領球隊打入2024年歐國盃8強，並相隔24年再次打入世盃決賽周，但分組賽只有1勝2負，排小組包尾出局，當時已傳出蒙迪拿帥位不穩。

9月底歐國聯展開後，土耳其兵敗如山倒，踢4場輸晒，合共失11球，僅入2球。土耳其足總最終決定解僱蒙迪拿，呢位52歲意大利名帥可以獲得91.5萬歐元(約805萬港元)賠償金。

土耳其傳媒指阿達杜倫成為土耳其新帥大熱，佢現時執教烏克蘭球隊薩克達，呢位名將球員時代曾效力馬體會、巴塞隆拿，並為土耳其國家隊上陣100次，擁有崇高地位，無疑係拯救土耳其嘅合適人選。