意大利再贏土耳其　「新韋利」入波追平95年前名宿紀錄

周二(6日)凌晨歐國聯A1組，意大利主場以3比1擊敗土耳其，兩循環「雙殺」對手，有「新韋利」之稱嘅前鋒比奧艾斯保薛圖今仗又入1球，追平95年前傳奇射手美亞沙嘅紀錄，成為意大利史上第2位累積入7球嘅21歲或以下球員。

雙方日前首循環交鋒，意大利作客大勝4比1，今仗有地利優勢，主帥文仙尼即使大幅輪換陣容，仍然夠殺，上半場26分鐘由施卡馬卡射入打開紀錄。換邊之後，土耳其靠阿拉爾森斯亞近門射入扳平，但意大利好快領先，尼高路巴列拿開出罰球，卡拉費奧利頂入成2比1。

戰至87分鐘，比奧艾斯保薛圖射入1球，近兩次對土耳其，都有取得入球，為意大利13次披甲有7球進帳，對上1位能夠入7球嘅意軍U21球員已經係1931年1月美亞沙(20歲零155日 )，呢位已故神鋒亦係意大利國家隊史上第2多入波球員(33球)，僅次於利華(35球)。

值得一提，美亞沙球員時代曾效力米蘭雙雄，兩隊1980年將主場以美亞沙命名，紀念佢嘅貢獻，但外界一般仍稱為聖西路球場。比奧艾斯保薛圖作為國際米蘭新一代射手，能夠同前輩美亞沙共享一項國家隊紀錄，別具意義。