與卡域克破冰對話　般費「最佳狀態」復出

陷入重大危機嘅曼聯，管理層決定不會即時換帥後，安排今次內亂兩位主角，領隊卡域克與隊長般奴費南迪斯進行破冰對話，據報近日操練中般費已重拾「最佳狀態」，預計周六作客車路士將復任正選。

英國傳媒報道，上周歐聯對科木大敗1比4後，卡域克同般費隔空對罵，般費批評教練團戰術失當，卡域克反擊球員不肯跑動，上場聯賽兩人矛盾升級，卡域克直接將般費雪藏貶為後備，結果曼聯慘敗0比3，般費賽後暗示對曼聯感到心淡。

本周初卡域克與管理層進行危機會議後，會方決定暫緩換帥，未來3場繼續由卡Sir帶隊，卡域克其後亦與般費進行對話，報道未有提及般費有否道歉，但卡Sir不再向對方追究，兩人心結已解開。

內部人士指，般費在過去48小時內已回復到「最佳狀態」，估計下場對車路士將復任正選，並將回到佢最熟悉嘅10號位，全力帶領曼聯谷底反彈。