[东方报]歐協：超強火力防不勝防 白禮頓大盤起菲

歐協聯焦點之戰，基達菲主場惡鬥白禮頓，論整體實力，英超「三哥」白禮頓秤先，上仗更加作客擊敗豪門曼城，士氣非常高昂，勢必乘勝追擊。西甲球隊基達菲踢法亦相當進取，各項賽事近4場總入球全開3球或以上，預料就算今仗輸波，都應該可以破蛋，首選2.5球入球大。（Now 639周五凌晨4時直播）

基達菲位處西甲中游，歐協聯2戰1和1負，成績只屬一般，但主場表演不俗，今季各項賽事8次主場出擊僅1敗，就係上輪歐協聯以2比5不敵瑞士球隊盧加諾。該仗基達菲開賽2分鐘就入波，但防線太脆弱，導致大敗收場，教練保達拉斯似乎並冇打算改變有前冇後踢法，跟住西甲吞畢爾包4蛋，上周中西班牙盃對低級別聯賽球隊，都先失2球，最後反勝3比2。基達菲上場聯賽上半場落後，下半場連入3球，贏西維爾3比1，可見起伏十分大，今仗隨時又會出現峰迴路轉戰情。

基達菲豆腐防線頂唔住
另邊廂，白禮頓今季演出令人驚喜，歐協聯2戰1勝1和，最犀利係踢9場聯賽狂入24球，屬於英超之中最多，甚至多過曼城4球，攻力非常誇張。「海鷗兵團」煞食之處係多位球員具備入波能力，令對手防不勝防，尤其係35歲中場老將柏斯高哥斯今季聯賽及盃賽，合共15次披甲入4球及6次助攻，包括對車路士、阿仙奴都貢獻傳射，以基達菲嘅「豆腐防線」，恐怕難以抵擋白禮頓強攻，有望合演入球騷。