[东方报]英超：拖肥車仔駁火入球騷

英超早場有矚目大戰，愛華頓主場迎戰車路士。愛華頓開季表現神勇，係聯賽其中一支不敗球隊，主場出擊會全力爭勝；車路士亦重新上力，上場大炒般尼茅夫5比1，豪華鋒線繼續火力全開，3.5球入球大博得過。（Now 621及611周六晚7時30分直播）

車路士喺9月份陷入低潮，3場聯賽只得1分，不過國際賽返嚟即刻生猛晒，5比1大勝般尼茅夫重振軍心，巴西前鋒祖奧柏杜復出即入2球，配合埋摩根羅渣士同高爾彭馬嘅「雙核」，仲有柏度尼圖、艾斯迪華奧等翼鋒隨時變陣，沙比阿朗素打造嘅華麗踢法唔講得笑。

雖然車路士條鋒線無堅不摧，不過佢哋嘅防守能力就好令人懷疑，今季3場作客已經失咗7球，而且連續22場聯賽都有失波，係球會自1961年以來最長聯賽連續失波走勢。車路士有前冇後打法，令佢哋近4場賽事有3次總入球開4球或以上，今場踢法不變之下，預計入波唔會少。

愛華頓愈踢愈順
愛華頓開季鬧前鋒荒，成隊只係得泰亞路比利一個正宗箭頭，不過呢位法國前鋒開始上力，連續2場聯賽有波入，同基亞利殊、達斯貝利賀爾等創造型球員愈夾愈熟，有望繼續衝擊車路士條脆弱防線。「拖肥糖」上場同侯城踢成2比2，今次返主場一定同車路士駁火鍊過。