施斯高或長抖4個月　曼聯想簽柏洛特救亡

曼聯前鋒班捷文施斯高傷勢情況唔樂觀，可能需要接受手術，一旦開刀將缺陣4至6個月，紅魔鬼缺乏正宗中鋒，準備明年1月轉會市場重開後簽入替代人選，並睇中貝迪斯射手特萊柏洛特。

班捷文施斯高曾經因為脛骨受傷，缺席今年5月至8月嘅比賽及操練，佢今次舊患復發，隨時又長抖，會方有需要增添中鋒。目標人選特萊柏洛特出身於熱刺青年軍，曾經被外借去米禾爾、葉士域治等多支英格蘭低組別聯賽球隊，早已非常熟悉英國本土比賽風格。

呢位24歲愛爾蘭國腳過去2季效力荷甲球隊阿爾克馬爾有出色表現，總共上陣97場入51球及17次助攻，今夏轉投貝迪斯繼續有神勇演出，代表作一定係9月初西甲射入皇馬大門，協助貝迪斯爆冷贏1比0，早前歐國聯為愛爾蘭上陣4場入4球。由於特萊柏洛特合約買斷費達8,000萬歐元(約7億港元)，如果曼聯要收購呢位射手，恐怕要「大出血」。