阿仙奴鋒線乏力　誓搶布魯日天才射手

阿仙奴上場英超僅小勝侯城1比0，再次反映鋒線力量不足問題，領隊阿迪達準備明年1月轉會市場簽入前鋒，除咗般尼茅夫射手高洛比，RB萊比錫翼鋒安東尼奧努沙之外，亦睇中布魯日天才射手泰索迪。

現年22歲嘅泰索迪上季嶄露頭角，今季表現更上一層樓，合共16次披甲入14球及1次助攻，代表作一定係歐聯對國際米蘭，上演「帽子戲法」轟入3球，協助布魯日作客爆冷贏4比3，引起多間大球會關注，阿仙奴現時亦加爭奪，力爭明年1月將佢收歸旗下，以免被其他球隊截胡。

阿仙奴今夏以4,000萬歐元(約3.5億港元)收購布魯日翼鋒謝索利斯，呢位希臘國腳表現出色，證明布魯日「出品」有保證，令兵工廠更有決心搶簽泰索迪。羅馬曾於8月開出3,600萬歐元(約3.1億港元)買泰索迪，但被布魯日拒絕，加上佢今屆歐聯有神勇演出，估計兵工廠最少要開出5,000萬歐元(約4.4億港元)轉會費，布魯日先至有機會放人。