[东方报]英超：喜鵲缺態插翼難飛 拖肥𡁻多鋪讓客啱素

英超獨腳戲有紐卡素主場迎戰愛華頓，雙方剛於上周中英聯盃16強交鋒，愛華頓發揮「喜鵲殺手」本色，以3比1勝出，近4次正式賽事碰頭贏3次，可以話係格食格。加上紐卡素近期陷入頹勢，即使有地利亦難以打破宿命，愛華頓受讓着數，讓球客勝「+1」玩得過。（Now 621周二凌晨4時直播）

「喜鵲」紐卡素愈踢愈沉，各項賽事近6場錄得2勝4負差劣成績，包括上場英聯盃作客輸畀愛華頓1比3，上半場已經落後2球，完全處於捱打，尤其係傳波經常出現失誤，該仗3個失波，有2球係被「拖肥糖」球員截到個波打反擊攻入。事實上，「喜鵲」防線一向甚為鬆散，今季8場聯賽已失14球，包括以1比4大敗於新升班球隊高雲地利腳下，更何況今仗對手係「剋星」愛華頓，形勢實在唔樂觀。

愛華頓壓迫踢法食住上
愛華頓由莫耶斯執教之下，表現非常硬淨，一度保持英超開季首6場不敗，直至近2輪聯賽遇到豪門車路士、阿仙奴先至輸波，實屬非戰之罪。「拖肥糖」面對同級數隊伍向來不落下風，上場英聯盃以壓迫性踢法，令紐卡素難以組織攻勢，贏得充滿說服力；既然戰術奏效，可以照辦煮碗，繼續用番呢招。兩隊短時間內再次交手，預料戰局變化不大，參考雙方近7次正式賽事對賽，愛華頓獲得4勝2和1負，今仗有力坐和望贏，讓球客勝係最佳選擇。