基亞利殊蒲足兩晚　愛華頓願畀機會

愛華頓球星基亞利殊最近又惹出麻煩，喺球隊備戰英聯盃前無故缺席操練，更被爆連續兩晚狂歡飲酒，上場賽事即被雪藏！不過，最新消息指愛華頓雖然大怒，但暫時未有一棍打死佢，決定再畀機會呢位球星改過自新。

英國《太陽報》報道，基亞利殊今次違規相當誇張，佢早前出席完倫敦一個頒獎禮後，轉頭去咗卡拉OK玩到凌晨；返到西北部之後，佢仲未玩夠，連續第2晚去酒吧劈酒，同隊友比克福特、迪比寧以及前曼城隊友基爾獲加，一齊飲酒睇歐聯直播。

雖然今次事件令外界質疑基亞利殊嘅職業態度，甚至估佢喺愛華頓前途凍過水，不過英國傳媒透露，愛華頓未將今次事件視為「最後通牒」，球會內部已經同基亞利殊進行嚴肅對話，警告佢絕對唔可以再犯。知情人士指出，基亞利殊平時訓練同體能保持其實唔錯，今次係偶發嘅紀律問題。莫耶斯希望展現出球會嘅核心價值，亦願意拉佢一把，協助佢重新融入球隊。