2
这个楼主还没有留下简介。
回复讨论
0
登录后可参与回复讨论。
2
效力意甲拿玻里嘅35歲比利時球星奇雲迪布尼，意甲之旅即將結束！迪布尼嘅老婆Michelle早前接受比利時雜誌《NINA》訪問，大吐苦水講述一家人喺意大利生活嘅掙扎，直言全家都好想盡快返比利時定居，宣布老公即將離隊。
迪布尼喺2025年夏天離開效力咗10年嘅曼城，以高薪簽約拿玻里，不過發展不似預期。上季佢飽受傷患困擾，又同前任領隊干地因戰術理念不合而鬧翻；今季改由艾里基執教，拿玻里戰績依然麻麻，季初更傳出迪布尼喺更衣室同隊友發生爭執。
迪布尼早前受訪亦毫不客氣，直認好開心干地離隊：「好明顯我當時過得好艱難，因為干地嘅足球理念同我完全唔同。老實講，我從來冇機會踢返我最擅長嘅位置。我哋踢得好保守，如果你成日想靠4-5-1贏1比0，你踢出嚟嘅就係嗰種足球。」
除咗球場上唔開心，拿玻里球迷嘅過度狂熱亦令迪布尼一家難唔順。Michelle表示：「奇雲喺拿玻里過住好受限制嘅生活，對佢嚟講一啲都唔好玩。而且我哋一家人根本冇辦法一齊喺市內做任何事。」Michelle最後補充：「當你已經贏盡一切，點解仲要搞到啲仔女嘅生活天翻地覆呢？」
