沙列巴全面復操　阿仙奴幸福的煩惱

阿仙奴喺英超重奪榜首，周四(5日)凌晨歐聯作客布拉格斯拉維亞前再收天大喜訊，自世盃後一直養傷嘅威廉沙列巴，近日已經全面復操，康復進度比預期快超過1個月，不過領隊阿迪達就會面對一個「幸福的煩惱」。

據英國傳媒報道，受背傷困擾嘅沙列巴原本預計要2027年先復出，但呢位中堅康復神速，日前已經全面復操，不過阿仙奴計劃循序漸進，會慢慢加強佢嘅訓練力度，希望等到今個月國際賽期後，先畀佢正式上陣。

被譽為世界最佳中堅之一嘅沙列巴回歸，對阿仙奴爭霸係大喜訊，但亦為阿迪達帶嚟煩惱，事關今季高價買嚟頂替沙列巴嘅安斯干沙，季初表現一夫當關，佢正選上陣嘅10場比賽，阿仙奴有6場0失球，冇理由突然將佢收起。

不過，阿仙奴喺英超同歐聯雙線作戰，需要雄厚陣容做輪換，而且安斯干沙亦可出任右閘。利物浦名宿加歷查表示：「阿仙奴係全英超、甚至全歐洲防守最好球隊，唔好忘記佢哋仲有個世界最佳中堅(沙列巴)未出，依家令我諗番起阿當斯當年嗰條傳奇防線。」