杜曹強調豪門球員冇特權

英格蘭近期每逢國際賽，都有唔少國腳「射波」，今次歐國聯大軍就有曼聯、阿仙奴、車路士嘅球員未踢先退隊，引嚟「豪門特權」嘅猜疑。英格蘭首戰輸波後，備受壓力嘅領隊杜曹就強烈否認會優待豪門球員，仲表明絕對唔會聽任何英超領隊嘅電話！

拒聽英超領隊電話
英格蘭首仗輸畀西班牙，嚟緊對捷克不容再失，杜曹就表明唔會因為球會壓力而畀球星「休息」：「我根本唔會聽英超領隊嘅電話！以前我自己做球會領隊嗰陣，亦從來唔會打畀國家隊主帥。」佢仲補充，就算當時打畀巴西或者阿根廷教練，對方都唔會理佢，因為國家隊同球會嘅目標完全不同。

杜曹強調喺國際賽刻意畀球員「休息」，係一種瘋狂做法：「我點解要畀球員一個錯覺，覺得『留力』或者『踢半場就算』係冇問題嘅呢？我絕對唔會！呢種諗法好瘋狂。」據報杜曹打算之後3場都會派出最強陣容，隊長哈利卡尼等球星會場場踢晒。