「施丹頭槌」20周年　8萬門票售罄等睇復仇之戰

法國由施丹接手執教後2戰2勝，將於周六(3日)凌晨歐國聯主場對意大利，施丹2006年世盃決賽對意大利，用頭槌頂馬特拉斯心口，被球證出示紅牌趕出場，成為法國失冠罪人，球員生涯最後一戰蒙上污點，現時以主帥身份重遇「仇家」，意義重大，法蘭西體育場8萬張門票兩月前已售罄，等睇施丹復仇。

施丹同意大利充滿恩怨情仇，球員時代曾於1996至01年效力意甲勁旅祖雲達斯，打出名堂，並協助法國喺1998年世盃8強淘汰意大利，以及2000年歐國盃決賽再次擊敗對方，捧晒呢兩大錦標，可以話係「意國剋星」。

2006年世盃決賽，施丹主射12碼入網，為法國先開紀錄，以為能夠再次食「意粉」，點知遇上一生最大「宿敵」馬特拉斯，呢位中堅唔只入波為意大利扳平，更於加時令施丹情緒失控，用頭槌頂向馬特拉斯心口，成為經典「施丹頭槌」。

由於該仗係施丹掛靴前最後一戰，黯然結束球員生涯，可以話係成也意大利、敗也意大利。由於呢段歷史，施丹今仗率領法國鬥意大利，備受各界關注，波飛一票難求，想見證佢復仇，甚至希望再睇「戲劇性」事件發生。